IMPRESIONES DE ASTURIAS.
Si el cantar, si el poner cara de risa,
de qu'unu ye dichosu fos la seña,
quiciás la dicha tóa 'n isti mundu
tendrínla los paisanos pel'aldea.
Y el que diz pel'aldea diz n'Asturies,
rinconcin de mió amor, de xanes tierra;
tanto más encantada y petecible,
cuento i debe á Dios solu so guapeza.
Anduvi pe la tierra en que cuntaben
que los Campos Elisios Dios punxera,
y en pruno á lo cimero fúi del monte,
qu'entarró con un gómitu á Pompeya.
Vi enllazase los álamos crecíos
co'la parra que d'un en otru cuelga;
y palacios y estautes, ví lo tóo,
pos sentada en na mar miré á Venecia:
y faciendo al mío modu comparances,
co'la idea p'Asturies siempre güelta,
non topabá daqué qu'asemeyara
lo que'nella entamó la Onipotencia.
Ya antes d'eso y allá en mios mocedáes
pe los montes anduvi á mío faena,
y al veme na más alta cuguruta,
abaxo el mundu, el cielu na cabeza,
¡qué nonada tan grande paecía
lo que facen los homes! ¡qué miseria!
¡qué grandeza, Señor, yera la tuya!
¡qué grande vía entoncies to grandeza!
[...]
Casi al frente, del llau de Colunga,
llevanta el puertu Sueve la cabeza,
que i dió á Roma les potres asturcones
que subín de rodíes una cuesta.
[...]